თამარ ტალიაშვილმა რუსეთის ფედერაციის მხრიდან საქართველოზე მორიგი ზეწოლის შესახებ ისაუბრა

ევროსაბჭოს რეგიონთა კონგრესისა და საქართველოს ადგილობრივ თვითმმართველობათა ეროვნული ასოციაციის (NALAG) ვიცე-პრეზიდენტმა, თამარ ტალიაშვილმა ბრიუსელში კონგრესის ბიუროს სხდომაზე ევროპელ კოლეგებს მიმართა. მან რუსეთის ფედერაციის მხრიდან საქართველოზე მორიგი ზეწოლის შესახებ ისაუბრა.
ტალიაშვილის განცხადებით, ამჯერად, რუსეთის პრეზიდენტმა რუსულ ტურისტულ სააგენტოებს საქართველოში სამოგზაურო ტურების ორგანიზება აუკრძალა. მტურისტული სეზონი საქართველოში უკვე დაწყებულია და შესაბამისად, იქმნება საფრთხე, რომ ასეთი რადიკალური ცვლილება უარყოფითად აისახოს ქვეყნის ეკონომიკაზე.
“ეს ნამდვილად გამოწვევაა, მაგრამ ქართველმა ხალხმა გადაწყვიტა ეს გამოწვევა სასიკეთოდ გამოიყენოს და ახალი შემართებით, მეტი ძალისხმევა მიმართოს ტურისტული ბაზრის დივერსიფიცირებისაკენ.
მე მოგმართავთ თქვენ, ჩემს და ჩემი ქვეყნის მეგობრებს, შემოგვიერთდეთ და მხარი დაგვიჭიროთ ამ ძალისხმევაში. თითოეული თქვენთაგანი თქვენს ქვეყანაში დიდ ავტორიტეტს წარმოადგენთ, თქვენი ნაბიჯები, გადადგმული ხსენებული მიმართულებით, მნიშვნელოვანი დახმარება იქნება ჩვენი ქვეყნისათვის ამ გამოწვევის გადასალახად”, -განაცხადა თამარ ტალიაშვილმა.
თამარ ტალიაშვილი საკუთარ “ფეისბუქ” გვერდზე ავრცელებს ფოტოებს.