სალომე ზურაბიშვილი: ვაპირებ, 1-ელ ივნისს წმინდა ნინოს გზა გავიარო

საქართველოს პრეზიდენტი განათლების, მეცნიერების, კულტურისა და სპორტის სამინისტროს ორგანიზებით გამართულ ღონისძიებას, „კულტურული მარშრუტები – საქართველო, ევროპა“, დაესწრო და მოწვეულ სტუმრებს სიტყვით მიმართა.
პრეზიდენტმა, კულტურულ მარშრუტებზე საუბრისას, ხაზი გაუსვა მის მნიშვნელობას საქართველოს ევროპაში ინტეგრაციის მიმართულებით.
“ჩვენი მიზანია, ევროპაში შევაღწიოთ ყველა საშუალებით და ამ გზაზე ვერავინ გაგვაჩერებს.
​ამიტომ გვჭირდება ძალიან ბევრი გზა, რომელიც ევროპას შემოიყვანს ჩვენში და დაანახებს მას, რა არის საქართველო და ამ მიმართულებით ეს კულტურული მარშრუტები ერთ-ერთი ძალიან საინტერესო ინსტრუმენტია”, – განაცხადა სალომე ზურაბიშვილმა.
მისი თქმით, ამ გზებით ევროპელები მიხვდებიან, რამდენად ევროპულია საქართველო.
“ეს მარშრუტები მნიშვნელოვანია როგორც კულტურული და ტურისტული კუთხით, ასევე – ეკონომიკური და რეგიონული თვალსაზრისითაც.
​ეს მარშრუტები ჩვენი რეგიონების აღმოჩენა იქნება, რადგან ეს არის რეგიონების პირდაპირი და სწორი განვითარების გზა. ამ მარშრუტების მნიშვნელოვანი ნაწილი უნდა იყოს არქეოლოგიის, ტრადიციების, რელიგიის მიმართულება, რადგან დღეს ევროპაში პილიგრიმობის გზით ბევრი ადამიანია დაინტერესებული და მეც ვაპირებ, 1-ელ ივნისს წმინდა ნინოს გზა გავიარო “, – აღნიშნა სალომე ზურაბიშვილმა.
პრეზიდენტის განცხადებით, მნიშვნელოვანია, რომ საქართველო და, კერძოდ, ქუთაისი ევროსაბჭოს კულტურული მარშრუტების მე -11 ფორუმს უმასპინძლებს.